මිලිටරි පාලනයක් ගැන කතා කරන්න සුමන්තිරන්ට සදාචාරාත්මක අයිතියක් නෑ – හිටපු පාර්ලිමේන්තු මන්ත්‍රී නාමල් රාජපක්ෂ

මේ රටේ මිලිටරි පාලනයක් ගැන කතා කරන්න සුමන්තිරන් මහත්මයට කිසිම සදාචාරාත්මක හා දේශපාලන අයිතියක් නොමැති බව හිටපු පාර්ලිමේන්තු මන්ත්‍රී නාමල් රාජපක්ෂ පවසයි. ඔහු මේ බව සඳහන් කළේ අම්බලන්තොට අරවනමුල්ල ප්‍රදේශයේ පැවැති සාකච්ඡාවකට සහභාගි වෙමිනි.

එහිදී වැඩිදුරටත් අදහස් දක්වමින් නාමල් රාජපක්ෂ මහතා මෙලෙස ද කීවේය.

සුමන්දිරන් මහත්තයට කිසිම අයිතියක් නැහැ මෙවැනි අදහස් පළකරන්න. මොකද මේ අය ​මේ ආණ්ඩුවට උදව් කරන අය නෙමෙයි. ඒ අය උදව් කරන්නේ එජාපයට. මේ කරන්නේ එජාපයේ මෙහෙයුමක්. එජාප ආණ්ඩුවේ අවුරුදු 5ක් ඉඳලා ඡන්දය දීපු දමිළ ජනතාවට කිසිදු සේවයක් නැහැ. ඒ ජනතාවගේ ඡන්දය එජාපයට පාවල දුන් සුමන්තිරන් මහත්තයා අද නැවත වතාවක් එජාපයේ අවශ්‍යතාවන්ට කටයුතු කරනවා.

බලන්න අද ගෝඨාභය මහත්තය කොතරම් සාධාරණව මේ මැතිවරණ කාලයේදී හැසිරෙනවාද කියලා. තමන් පත් කරපු තමන්ගේ ආණ්ඩුවේ නිලධාරීන්ට නියෝගයක් දෙනවා කිසිදු දේශපාලන කටයුත්තකට මැදිහත් වෙන්න එපා කියලා. ඒ නිලධාරීන් පත්කළේ ඒ රාජ්‍ය ආයතනයේ කටයුතු සඳහා පමණයි කියලා. ඉතින් එවැනි පාලනයක් අද මේ රටේ තියෙනකොට සුමන්තිරන් මහත්තයට කියන්න දෙයක් නැතිවෙනකොට මිලිටරි පාලනයක් ගැන කතා කරනවා. ප්‍රභාකරන් උතුර පාලනය කළ කාලයේ සුමන්තිරන් මහත්තයලා කොහෙද හිටියේ. දැන් මේ ප්‍රශ්නේ තියෙන්නේ ප්‍රභාකරන් ඉවර කර දමිළ ජනතාවට ඡන්ද බලය ලබා දීපු නිසයි. දැන් ඒ ගොල්ලන්ට තේරෙනවා. එන්න එන්නම දමිළ ජනතාවත් ඒඅයට ඡන්දය දෙන්​නේ නැහැ කියලා.

මෙරට නීතියට අවනත නොවී මෙරටට පැමිණි ඇමෙරිකානු රාජ්‍ය තාන්ත්‍රිකයන් සම්බන්ධයෙන් ආණ්ඩුවක් විදිහට අපේ මතය ප්‍රකාශ කරලා තිබෙනවා. පෞද්ගලිකවම මම ඒ ගැන කනගාටු වෙනවා. මොකද වගකිවයුතු රටක රාජ්‍ය තාන්ත්‍රික නිලධාරියෙක්. අපේ රටේ සෞඛ්‍ය අංශ නිර්දේශයන්ට ගරු කරන්නේ නැතිව හැසිරීම පිළිබඳව. මින් ඉදිරියට මෙවැනි දෙයක් නොවන්න බලධාරීන් වගකියන්න ඕන කියන කාරණය අපි ප්‍රකාශ කරනවා. ලෝකයේ රටවල්වල මේ වෙලාවේ පවතින තත්ත්වය පාලනය කරන්න නොයෙක් ක්‍රියාමාර්ග අරගෙන තිබෙනවා. කරුණාකරලා ඒකට අනුගත වෙන්න. ඒවාට ගරුකරන්න තමන්ගේ තානාපති වරප්‍රසාදවලට මුවාවෙලා තමන්ගේ රටේ හයිය පෙන්නන්න සූදානම් වෙන්න එපා. මොකද ඒ තුළ අපහසුතාවට ලක්වෙන්නේ අපේ රටේ ජනතාව පමණක් නෙමෙයි ඒ රටවල්වල ආණ්ඩුත් අපහසුතාවට ලක්වෙනවා. මේ වගේ දේවල් වුණාම අපට මේ රටවල් සැලසුම් සහගතව කොරෝනා අපේ රටවල්වලට එවනවාද කියලා හිතෙනවා.

අජිත් පුෂ්පකුමාර – අම්බලන්තොට (සති අග අරුණ)

මුල් පුවත සදහා : https://bit.ly/3hhyVVW